“कुणाच्या इतक्याही”

“कुणाच्या इतक्याही”

कुणाच्या इतक्याही जवळ जाऊ नये की

आपल्याला त्याची सवय व्हावी,अन

तडकलेच जर हृदय कधी

तर जोडताना असह्य यातना व्हावी !

 

 

स्वप्नात कुणाला असंही बघू नये

की आधाराला त्याचे हात असावे

अन् तुटलेच जर स्वप्‌न अचानक तर

हातात आपल्या काहीच नसावे !

 

 

कुणाला हतकाही वेळ देऊ नये

की आपल्या क्षणा क्षणावर

त्याचाच अधिकार व्हावा

अन एक दिवस आरशासमोर आपणास

आपलाच चेहरा परका व्हावा !

 

 

कुणाची इतकीही ओढ नसावी

कि पदोपदी आपण त्याचीच वाट बघावी

अन त्याची वाट बघता बघता

आपलीच वाट दिशाहीन व्हावी ।

 

 

कुणाची इतकीही सोबत नसावी

की प्रत्येक स्पंदनात ती जाणवावी

अन ती साथ गमावण्याच्या भीतीने

डोळयांत खळकन् आसवे जमावी ।

 

 

कुणाला इतकेही माझे म्हणू नये

की आपले मी पण

आपण विसरुन जावे

अन त्या संभ्रामात त्याने आपल्याला

ठेच देऊन जागे करावे !

 

पण , पण ……….

 

कुणापासून इतकेही दूर जाऊ नये

की आपले जगणेच मुश्लिक व्हावे,

अन ……………

दूर दूर आवाज दिला तरी

आपलेच शब्द जागीच घुमावे……

 

 “कुणाच्या इतक्याही”VARIOUS TYPE OF POEM